"Афармленне творчай майстэрні Нясвіжскага дзяржаўнага каледжа ў корпусе былога кляштара бенедыкцінак, помніка архітэктуры XVI стагоддзя" - менавіта так гучыць назва пректа, заяўленага на конкурс выкладчыкамі каледжа І.В.Шыкулавым i А.А. Цыгановай.
Iдэя праекта– распрацаваць дызайн і выканаць на практычных занятках з навучэнцамі афармленне творчай майстэрні, якая знаходзіцца на тэрыторыі архітэктурнага комплексу былога кляштара бенедыкцінак XVІ ст. Улічваючы гістарычную каштоўнасць будынка, было вырашана ў афармленні інтэр’ера сумясціць прынцыпы і метады мастацкай рэстаўрацыі і графічнай кампазіцыі. Так, пакінутыя зандажы аўтэнтычнай цаглянай кладкі складаюць адзінае кампазіцыйнае рашэнне ў спалучэнні з альфрэйным жывапісам і абсталяваннем майстэрні для практычных заняткаў. У кампазіцыю роспіса ўваходзяць: копія фрагментаў гравюры Францыска Скарыны, выява сістэмы прапорцый чалавека Леанарда да Вінчы «Вітрувіянскі чалавек» і «Мадулор» Ле Карбюзье. Такім чынам спалучаюцца дзве эпохі: эпоха Адраджэння XVI ст. і эпоха мастацтва XX ст. Інтэр’ер майстэрні выконвае адукацыйна-выхаваўчыя і эстэтычныя функцыі. Навучэнцы вывучаюць гісторыю і культуру свайго месца ў кантэксце з сусветнай і сучаснае мастацтва. Пляцоўка майстэрні выкарыстоўваецца як тэатральная зала для правядзення імпрэзаў і можа стаць месцам для экскурсій, пад час якіх распавядаецца як мастацкая рэстаўрацыя становіцца метадам адраджэння культуры.