Штомесячнаму навукова-педагагічнаму часопісу “Народная асвета” сёлета споўнілася 100 гадоў. Такі сталы ўзрост педагагічнага выдання гаворыць аб тым, што справа, пачатак якой заклалі настаўнікі-асветнікі ў пачатку XX стагоддзя, патрэбная, здяйсняецца на высокім прафесійным узроўні, перадаецца з цягам часу ў надзейныя рукі сучасных метадыстаў-навукоўцаў. З першых гадоў сваёй выкладчыцкай працы памятаю, што першым дарадчыкам у прафесійнай падтрымцы нас, маладых спецыялістаў, у далёкіх 1990-2000 гадах была менавіта “Народная Асвета”, якую давалі пачытаць толькі ў бібліятэцы, ці ў метадычным кабінеце. Педагагічныя навацыі прыходзілі да нас на мяжы стагоддзяў з гэтага аўтарытэтнага выдання… І сёння сярод розных галіновых выданняў мы з цікавасцю гартаем старонкі часопіса, каб знайсці новыя ідэі для сваёй педагагічнай дзейнасці.
У выкладчыкаў і навучэнцаў нашага каледжа з’явілася яшчэ адна нагода пачытаць “НА”: у ліпеньскім нумары творчы праект выдання “Люстэрка прафесійнай адукацыі” і рубрыка “Партрэт асобы ў адукацыі” змяшчае матэрыял пра нашу ўстанову адукацыі. Пад час юбілейных мерапрыемстваў 40-годдзя з часу адкрыцця Нясвіжскага педагагічнага вучылішча вядучы навуковы рэдактар часопіса Л.В.Астаповіч пагутарыла з адміністрацыяй каледжа, пазнаёмілася з метадычнымі распрацоўкамі супрацоўнікаў і прапанавала да друку некаторыя з іх. Прэзентацыя вопыту Нявіжкага дзяржаўнага каледжа імя Якуба Коласа ў Год якасці вышла ў часопісе пад назвай “Падрыхтоўка будучых настаўнікаў са знакам якасці”.
Гартайце старонкі часопіса, пачытайце артыкулы, ці скарыстайце кюар-коды для знаёмства са зместам метадычных распрацовак! Спадзяёмся, што нашы ідэі будуць карыснымі не толькі для ўстаноў сярэдняй спецыяльнай адукацыі, але і для тых, хто працуе з навучэнцамі педагагічных класаў, займаецца профарыентацыяй, краязнаўствам.
Выказваем словы ўдзячнасці Людміле Васільеўне Астаповіч і ўсёй рэдакцыйнай калегіі часопіса “Народная асвета” за магчымасць падзядіцца нашай гісторыяй, нашымі планамі і напрацоўкамі з калегамі і за прафесійнае суправаджэнне нашых матэрыялаў.
Віншуем каллектыў часопіса “Народная асвета”, яго галоўнага рэдактара Святлану Уладіміраўну Мазурыну, усіх аўтараў, рэдактараў, навуковых кансультантаў са 100-годдзем з дня выхаду першага нумара і жадаем творчых дасягненняў і новага плёну на ніве асветы словамі Якуба Коласа: “Браты! Вялікая дарога
Чакае нас і родны край –
Жніво настала, працы многа, –
Навукі семя засявай!”
Т.А.Цвірко, намеснік дырэктара
па вучэбна-метадычнай рабоце
.jpg)
.png)